Biblioteca Pública de Santiago Ánxel Casal

Sobre Nosotros

A Biblioteca Ánxel Casal é a biblioteca pública do Estado en Santiago de Compostela. Os principais servizos que oferta son a información, a formación e a promoción da cultura. Oferta tamén un espazo de ocio e participación cidadá.

Historia

A Biblioteca pública de Santiago Ánxel Casal ábrese para cubrir as necesidades básicas de información e cultura de tódolos usuarios e usuarias.
Con esta páxina pretendemos chegar a máis público e dun xeito máis áxil que a través do portal web, difundir as nosas actividades, as novas relacionadas coa biblioteca e o relativo á cultura e ás bibliotecas da nosa comunidade de interese para os nosos seguidores e seguidoras.

Os servizos que ofertamos na bibliotecas son os seguintes:

* Lectura na sala e consulta de materiais especiais
Este servizo ofrécese de maneira simultánea en distintas salas da biblioteca.
As salas distribúense da seguinte maneira:
-Hemeroteca, Fondo local e bedeteca (andar baixo)
-Sala Infantil (1º andar)
-Linguas, literatura, viaxes, música, cine e audiovisuais (2 andar)
-Libros informativos (3º andar)
Os materiais obxecto de consulta van dende obras de referencia ata documentos específicos das distintas áreas do coñecemento, e en diversos formatos —libros, CD, CD-ROM, DVD, Blu-Ray, revistas, prensa, etc.

* Préstamo
A Biblioteca ofrece varias posibilidades de préstamo:
-Préstamo a domicilio individual
-Préstamo colectivo a entidades
-Préstamo interbibliotecario
Levámosche os préstamos a casa!
--- Préstamo de portátiles
Poñemos á disposición dos usuarios adultos 10 portátiles con todos os periféricos que precisen: rato, lector/gravadora de cd/dvd, lector de tarxetas, lector de DNI-e ...
A normativa de prestámo pode consultarse na seguinte ligazón:
http://bibliotecas.xunta.gal/santiago/gl/servizos/servizo-de-prestamo


---Préstamo de ebooks a través da plataforma GaliciaLe
GaliciaLe é a plataforma do libro electrónico das bibliotecas públicas galegas que ten por obxectivo facilitar o acceso de toda a cidadanía á lectura neste formato. Proporciona un servizo de préstamo temporal de obras en formato dixital de temáticas diversas.
Hai dous catálogos: o do libro electrónico en galego” e o do libro electrónico en castelán. Os libros incluídos nestas dúas contornas poden lerse en dispositivos compatibles: tabletas, teléfonos móbiles, ordenadores persoais e lectores de libros electrónicos.
Pregunta na biblioteca ou infórmate na páxina http://www.galiciale.gal

* Biblioteca Accesible
A Biblioteca Pública de Santiago “Ánxel Casal” pon en funcionamento o servizo “Biblioteca Accesible”, que ten como obxectivo que toda persoa con calquera tipo de discapacidade poida acceder á biblioteca e aos recursos informativos que hai nela.
Con esta finalidade, ofrecemos ordenadores e periféricos, animación cultural, formación de usuarios e unha colección accesible con libros e audiovisuais para colectivos que requiren unha atención diferenciada.
A esta oferta, engádese un edificio que xa estaba dotado dunha infraestructura accesible: ascensores, baños adaptados, accesos sen escalóns e con portas de apertura automática, mobiliario adaptado para a consulta de catálogos...
--Colección Accesible
Esta pequena colección de libros, audiovisuais e documentos electrónicos está dirixida a colectivos que precisan unha atención diferenciada. Está ubicada no 2º andar e na Sala Infantil. Forman parte dela:
-Libros de lectura fácil
-Libros en Letra Grande
-Lectura para Invidentes
-Libros temáticos sobre discapacidade
-Libros informativos relativos a lexislación sobre discapacitados, formación laboral, inserción, organizacións, dicionarios en lingua de signos, etc.
-Audiolibros
-DVDs e vídeos
-Recursos electrónicos
-Animación Cultural: un sábado ao mes o contacontos infantil faise en lingua de signos, a cargo da Federación de Asociación de Persoas Xordas de Galicia.
-Formación de usuarios: programa de formación a grupos no uso do hardware e software accesible (os venres ás 13 h. Requírese inscrición previa)
-Ocio: dispoñemos dun xadrez especialmente deseñado para integrar aos invidentes neste xogo.

* Información: xeral e bibliográfica
Co fin de facilitar ó lector o acceso á Biblioteca e ó uso dos seus fondos, o Centro dispón dun servizo de atención e información que se ofrece dende o terceiro andar. Este servizo axuda ós usuarios a:
Coñecer as normas de uso da Biblioteca e a ubicación dos diferentes servizos.
Utilizar mellor os fondos.
Resolver as dúbidas sobre a obtención da información, tanto bibliográfica coma xeral.
Manexar o OPAC (catálogo en liña da Biblioteca), as bases de datos en CD-ROM e o acceso a Internet.
Se o usuario desexa algunha obra que no ten a Biblioteca, pode solicitar a súa adquisición cubrindo o impreso de solicitude ou desiderata que atopará no mostrador de información e control de tódalas salas da Biblioteca.

* Consulta de Internet
A Biblioteca dispón de 36 postos específicos para acceso a Internet, distribuidos entre as 4 andares.
A consulta é pública e gratuíta. A primeira vez que se usa hai que rexistrarse cubrindo un pequeno formulario que aparece na pantalla.
Ollo! hai que quedarse co nome de usuario e a contrasinal para usalos máis veces. Se non o lembras ou o perdes, pregunta no mostrador.
O servizo está pensado para a procura de información con fins culturais, de investigación e de consulta en xeral.
O tempo máximo para a utilización deste servizo é de 90 minutos por usuario e día.
O ordenador reiniciarase automaticamente ao rematar cada sesión.

* Reserva de Salas de traballo en grupo
Na biblioteca hai dúas salas de traballo en grupo dispoñibles para o seu uso polo público. O mínimo de persoas para a reserva son dúas. Para facer a reserva é preciso anotarse nunha lista no mostrador do andar baixo ou chamar ao número 881 999 401.
As salas están ubicadas no 3º andar e poderánse utilizar para calquera actividade sen ánimo de lucro.

* Salón de Actos
O Salón de Actos da Biblioteca tamén é público e calquera pode reservalo para realizar actividades de tipo cultural (presentacións de libros, exposicións, conferencias ...)
pódese facer a reserva a través do formulario:
http://bibliotecas.xunta.gal/santiago/gl/reserva-de-instalacions

ou chamando á biblioteca ao teléfono 881 999 401.

* Reprografía
En cada andar (salvo no 2º) hai a disposición dos usuarios 1 fotocopiadora en branco e negro en autoservicio.
As fotocopiadoras só se poderán utilizar para realizar copia de parte dos libros ou publicacións periódicas da Biblioteca, respetando a lexislación vixente sobre Propiedade Intelectual. En ningún caso se poderán utilizar para facer fotocopias doutros tipos de materiales tales como apuntes, traballos propios, etc.